من نحن

خبوا عيالكو يا جماعة

كتب : د.أحمد الخطيب

خبوا عيالكو يا جماعة …
انا بتكلم بجد ..
حتى اللى معندوش حساسية …
الأطفال معظمها متحسس من الجو الساقع ده ،،
نقفل كويس الشبابيك ونتغطى بالبطاطين وندفى الأوض ..
محبكتش حموم ونضافه دلوقتى معلش خلوها مرة او مرتين في الأسبوع …
بابا متدخنش سيجارة فى البيت لو سمحت ده الهوا الوحيد اللى ابنك بيستنشقه ..
الأطفال اللى بدأت ترشح من الأنف ،، تسليك مستمر بمياه بحر ، او محلول ملح او اوتريفين بيبي او لايس ،، واحسن طريقة شفاط الانف (الفيديو في الكومنتات)..
الأطفال اللى فوق السنة . اوتريفين اطفال مرتين توقف الرشح الشديد بإذن الله ..
الكحة بدأت ؟؟
السوايل ثم السوايل ثم السوايل ثم السوايل ..
ينسون ونعناع وتيليو وكراوية والمياه لازم تتشرب فاتره اياكم والساقعة ..!
زادت ؟ ادوية الكحة الطبيعيه زى الاعشاب وجوافه وبلسم وكافسيد واخواتهم ممتازة مرتين تلاته في اليوم ،،
إياكى تسكتى وتسيبي ابنك من غير كشف لو لقيتيه بينهج او صدره بيزيق او الكحة شديدة او مستمرة مبتفصلش او بتصحيه من النوم بالليل او بترَقّدُه بالنهار او معاها ترجيع بلغم او حرارة عالية ، أو رضيع وبيشرق او رافض الرضعه او بيرجع الرضعه ،، غير كده اصبرى واتطمنى ،، غير كده برد عادى ومين فينا مبيجيلوش برد عادى يا مدام ؟
أطفال حساسية الأنف اهتموا بالبخاخات الانفية ومتهمليش الجرعات ،، ابنك رافض ؟ اديه بعد ما ينام وقبل ما يصحى .
اطفال حساسية الصدر بخاخات الفنتولين وجلسات الاتروفنت والفاركولين متستنوش انتو فاهمين كويس لما صدر اولادكم يقفل محدش هينفعك بعد ربنا الا الجلسات دي !
الأطفال اللي صوتها مبحوح وكحتها ناشفه جداً أو
مجروحة فوراً حلة مياه مغليه ومعلقتين تانتم أخضر – ايوا الغسول الفم ده – واستنشاق البخار الطالع منه تلات مرات بوميا ..
باقى بس حاجة اخيره عشان مطولش عليكم ،،
مش بايدى والله في اطفال فائقة التحسس Highly allergic كل اسبوعين رشح وزكام وكحة وحرارة والتهاب جيوب انفية متكرره دى علاجها على المدى القصير بيبقى المضاد الحيوى طبقاً للكشف ، وعلى المدى الطويل بخاخات الانف وأمصال الحساسية ،،
نفس ذات الأطفال دى ممكن تخف لوحدها- ٤٠٪ لو صبرنا على الحرارة ٣-٤ ايام ،، عشان كده لازم تعذرونا لما ندى طفل مضاد ،، وتساعدونا اكتر نصبر على الحرارة باعطاء الخوافض والكمادات كل ٤-٦ ساعات …
صدقونى والله ،،
كل دور ابنك يطلع منه من غير مضاد حيوى ،،
المفروض يبقى عيد ،،
لإن ابنك طلع كسبان مناعه وصحة وحماية بفضل الله .

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق
%d مدونون معجبون بهذه: