كتب : دكتور أحمد أمين
حضرتك بتلاحظي ان ابنك بيعمل تصرفات غريبة و اكبر من سنه و مش عارفة ليه ؟!
ابن حضرتك بقى يرد عليكي ردود انتي مربتهوش عليها و مش متعوداها منه ؟
بنت حضرتك ابتدت تطلب طلبات كتير و مبالغ فيها ؟
ابنك بيسأل عن حاجات مش مناسبة لسنه ؟
بتستغربي لما بتشوفي بوستات عن بنات ١١ و ١٢ و ١٣ و حتى ١٦ سنة متغيبيين و بتسألي ازاي بنات كبار في السن ده بيتخطفوا.
حضرتك فرحانة ان ابنك كبر و عمل لنفسه اكونت على الفيس شات و السناب بوك و الانسجرام و ا؟! ..
طيب اسمعي اللي جاي بقى و ركزي في الصورة دي هتفهمي ليه ،،
النهاردة جايب لك توصيات منظمة (Action for children)
بالنسبة للحاجات اللي يقدروا يستخدموها على الانترنت حسب السن المناسب.
و خللي بالكم ان المنظمة دي منظمة عالمية بتهتم بصحة الاطفال البدنية و النفسة و بحماية الاطفال من
المخاطر اللي بيتعرضوا ليها في حياتهم و توصياتهم مبنية على دراسات ووقائع و مشاكل حدثت لأطفال بالفعل.
طيب بتقول ايه التوصيات دي ؟
بتقول ان اي برامج التواصل الاجتماعي ومنصات تشغيل الميديا (الفديوهات و الصور) عموما متنفعش للاطفال اقل من ١٣ سنة !!.
و ده يشمل برامج الفيسبوك و الانستجرام و السناب شات و التويتر
برنامج الواتس اب (وما ادراكم ما الواتس اب) مش مسموح لحد اقل من ١٦ سنة انه يستخدموا
اليوتيوب : اللي كل عيالنا لازقين وشهم ليل نهار فيه و احنا مش عارفين بيعملو عليه ايه ؟
اليوتيوب مش المفروض الطفل اللي أقل من ١٨ سنة يتفرج عليه لوحده ابدا ،، و لو هيتفرج تحت اشرافكم يبقى لما يتم ١٣ سنة.
دي البرامج المشهورة و باقي البرامج هتلاقوها في الصورة.
حاسين ان ده وهم مش كده ؟! كل الآباء و الامهات اللي حصل مشكلة لأولادهم كان عندهم نفس الاحساس برضو ،، بس قبل ما تقع المشكلة.
ربنا يحفظ اولادنا.
