من نحن

نجيب الشتاء من الآخر بقى !!

كتب : أحمد أمين

من الآخر بقى عشان الأمهات اللي بتجري على دكتور و اتنين و تلاته اول ما ابنها يكح او يعطس ،، و في اخر الدور تلاقي معاها ٣ روشتات مختلفة من ٣ دكاترة مختلفين و كيس علاج تفتح بيه صيدلية و الولد برضه ما خفش

من الآخر بقى عشان الأمهات المتوترة اللي بتقضي عند الدكتور وقت اكتر من الوقت اللي بتقضيه في بيتها

من الآخر بقى عشان الأمهات اللي بتسأل كل يوم على حاجة بتقوي المناعة و بتستغرب ان ابنها بيخرج من دور يدخل في اللي بعده

🖐🏼 من الآخر :

– اي طفل حضرتك ،، طبيعي انه يتعب لحد ١٠ مرات في السنة من ادوار برد و كحة و خنفرة و سخونية و رشح ،، ده طبيعي و عادي خالص

– مفيش حاجة اسمها هديله حاجة تقطم الدور من اوله ،، او حاجة تجيب من الآخر ،، مفيش حاجة في الطب اسمها كده صدقيني ،،

– الدكتور التاني اللي حضرتك روحتيله لما الولد مخفش على الكشف الاولاني مدالوش الدواء السحري اللي خلى الدور يقطم معاه ،، الفكرة كلها ان الدور اخد وقته و خلص ،،

– طبيعي جدا ان الكحة تغلس معانا و تطول فترة بعد الدور ،، متقعديش تجربي في ادوية عمال على بطال على امل ان الكحة تقف

– ابنك مدام معندوش حساسية انف او صدر ،، نفسه مرتاح ،، بينام بالليل معقول ،، حركته و نشاطه كويس ،، عادي انه يكح ،، و عادي كمان انك تسيبيه يكح من غير ما تديه دواء خالص

– سوايلك معاكي ،، بطانيتك ،، محلول ملحك و مناخيره النضيفة ،، خافض حرارتك بيبقوا كفاية في ٩٠٪؜ من الادوار دي ،، حاولي تجربيهم الاول بدل ما تجري على الدكتور من أول عطسة

– الدكتور مش هو خط الدفاع الأول لطفلك ،، مناعته هي خط الدفاع الأول ،، نهتم بالغذاء الصحي الغني بالفيتامينات (خصوصا الف و د و ج) و التطعيمات يبقى هنقوي خط دفاعه الأول ((راجعوا بوستات التطعيمات و الأغذية اللي بتساعد في تقوية المناعة اللي موجودين على الصفحة))

– زي ما الدكتور مش هو خط دفاعك الأول ،، المضاد الحيوي مش سلاحك الفتاك في القضاء على دور البرد و الكحة ،، اساسا ٩٠٪؜ من الادوار دي فيروسية و المضاد الحيوي مالوش دور فيها اساسا

🖐🏼 من الاخر ،، ابنك نفسه كويس – نشاطه كويس – بينام بالليل معقول ،، معندوش مرض مزمن نقلق منه ،، يبقى متجريش على دكتورك اول ما الولد يعطس او يكح ،، و متغيريش من دكتور للتاني على الفاضي و المليان ،، ادي فرصة لمناعة ابنك عشان تشتغل الأول

بلاش تفسحي ابنك كل ويك اند عند الدكتور

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق
%d مدونون معجبون بهذه: